《一個屎頂爛頂你臭脾氣的人》
身邊嘅人的確係有難頂嘅時候，可以係突然一句車埋嚟埋怨你，可以係不可理喻，更明明大家自出娘胎或已相識多年，脾氣大起上嚟醒你一句「你唔好以為你好了解我」。
我以前亦有遇過同樣狀況，人在香港，乜都趕急快，我活在其中，可能都會口快快頂返對方:「既然你覺得我唔了解你咁大家仲有咩好傾?」🙄
人大咗，走遠咗，慢活咗，發覺其實親情友情同愛情一樣，需要忍耐同包容。唔好睇少親友情，因為比起戀人，有時候親人友人實在太親密，太彼此信任，對方一舉一動太瞭如指掌，於是對方豪不保留地將情緒發洩喺你身上。因為對方知道只有你可讓她除脫下所有盔甲，放膽做返佢最真我嘅一面，真情流露，放下佢以往人前人後嘅硬禮貌，偽笑容。
掛電話後心梗痛，把刀比失戀時桶得還要深😖，很討你厭但又捨不得，梗難頂都想為她頂下去，可惜條氣又chok住chok住咁。過一排啖氣過左後又會心思思聊返對方講嘢👉👈，因為心底裡你係知道吵架的原因，無非都係為對方著想。
不過我哋要知道，凡事總有個極限。人心肉做，儘管脾氣再好，忍耐力再高，我哋總不能好似 i-robot 輸入程式咁，㩒個制就可以無止境地放臭脾彈炮轟對方💨。如果有一日，你豪不留情地再炮轟對方後，從此失去了呢位好友，一個屎頂爛頂頂你啲臭脾氣嘅人消失於你嘅世界裡，你就會後悔點解自己咁惡頂。
無論友情親情都同愛情一樣，要用耐性灌溉方可茁壯成長，要悉心栽培方可收成正果。經歷了不多少風雨的感情，你是絕對不想用脾氣去劃上句號。
#臭脾彈唔係臭屁彈
#難哽鬥惡頂
#別讓疼你的人無止境忍你的難頂
#抱抱身邊不斷屎頂爛頂你臭脾氣的人
Search